Wednesday, November 30, 2011

ಮಕ್ಕಳು ಹಿಡಿಯೋರು ಬಂದಿದ್ದಾರಂತೆ....


ಮಕ್ಕಳ ಹಿಡಿಯೋರು....!

ಯಾರು ಹೇಳ್ತಾರೋ....ಯಾವಾಗ ಹೇಳ್ತಾರೋ ಗೊತ್ತಿಲ್ಲ.....ಮಕ್ಕಳು ಇದ್ದಕ್ಕಿದ್ದಂತೆ ಈ ಗಾಳಿಸುದ್ದಿಯನ್ನು ಒಬ್ಬರಿಂದ ಒಬ್ಬರಿಗೆ ಹರಡಿ ಹೆದರಿ ಕಂಗಾಲಾಗುತ್ತವೆ...ಇತರ ಮಕ್ಕಳನ್ನು ಚಿಂತೆಯ ಕಡಲಲ್ಲಿ ತೇಲಿಸುತ್ತವೆ...

ಮಕ್ಕಳು ಹಿಡಿಯೋರು ಬಂದಿದ್ದಾರಂತೆ....ಅಜ್ಜಿ ಹೇಳಿದ್ರು..ಹೊರಗೆಲ್ಲೂ ಹೋಗ್ಬೇಡ ಅಂತ.....
ಮಕ್ಕಳು ಹಿಡಿಯೋರು ಬಂದಿದ್ದಾರಂತೆ....ನಾನಂತೂ ಆಟಕ್ಕೆ ಬರೋಲ್ಲಪ್ಪಾ......
ಆಕಡೆ ಬೀದಿಯ ಶ್ವೇತನ್ನಾ ಮಕ್ಕಳು ಹಿಡಿಯೋರು ಹಿಡ್ಕೊಂಡು ಹೋಗಿದ್ರಂತೆ.....ಅವರಪ್ಪಾ ಪೋಲಿಸಿಗೆ ಹೇಳಿ ಬಿಡಿಸಿ ಕೊಂಡು ಬಂದ್ರಂತೆ....
ಹೀಗೆ ಗುಸುಗುಸು ಆಗಾಗ ಮಕ್ಕಳ ಬಾಯಲ್ಲಿ ಕೇಳಿಬರುತ್ತವೆ....

ಮೊನ್ನೆ ಹೀಗಾಯ್ತು..ಹೊನ್ನಾವರದ ಹತ್ತಿರದ ಹಳ್ಳಿಯಲ್ಲಿ ನಡೆದು ಕೊಂಡು ಹೋಗುತ್ತಿದ್ದೆ,ಶಾಲೆ ಬಿಟ್ಟ ಸಮಯ,ಇಳಿ ಬಿಸಿಲು,ಹಸಿರು ಹೊದ್ದ ಹಾದಿ,ನೆರಳು ಬೆಳಕಿನಾಟ.....
ಇಂತಹ ಹಿತಕರ ಸನ್ನಿವೇಶದಲ್ಲಿ....ಶಾಲೆಯಿಂದ ಮನೆಯತ್ತ ಹೊರಟ ಮಕ್ಕಳು ರಸ್ತೆಯ ತುಂಬಾ ಆಟವಾಡುತ್ತಾ ಬರುತ್ತಿದ್ದರೆ...ಕ್ಯಾಮೆರಾ ಎತ್ತದೆ ಸುಮ್ಮನಿರಲಾದೀತೇ....?
ಸೂಕ್ತ ಜಾಗ ನೋಡಿ ಮಕ್ಕಳ ಚಿತ್ರ ತೆಗೆಯಲು ಅಣಿಯಾಗುತ್ತಿದ್ದಂತೆ ನನ್ನನ್ನು ಗಮನಿಸಿದ ಪೋರಿಯೊಬ್ಬಳು ಏ..ಮಕ್ಕಳು ಹಿಡಿಯೋರು......ಓಡಿ...ಓಡಿ....ಎಂದೊಡನೇ ಇಲ್ಲಾ ಮಕ್ಕಳು ಬಂದದಾರಿಯಲ್ಲೇ ತಿರುಗಿ ಓಡಿ ಬಿಡೋದೆ..!

ನಾನು ಮುನ್ನಡೆದಂತೆಲ್ಲಾ ಅವು ಇನ್ನೂ ಜೋರಾಗಿ ಓಡ ತೊಡಗಿದವು! ಕ್ಯಾಮೆರಾ ಚೀಲಕ್ಕೆ ಸೇರಿಸಿದೆ...ರಸ್ತೆಯಂಚಲ್ಲಿ ಸ್ವಲ್ಪ ಹೊತ್ತು ನಿಂತೆ..ಉಹೂಂ...ಮಕ್ಕಳು ಮಾತ್ರ ಮನೆಯ ಹಾದಿಗೆ ಮರಳಲಿಲ್ಲ!

ನಾನಂತೂ ಮುಂದೆ ಸಾಗ ಬೇಕಿತ್ತು...ಇವು ಹೀಗೆ ಓಡುತ್ತಲೇ ಹೋದರೆ.... ಕತ್ತಲಾದರೆ ಮಕ್ಕಳು ತಿರುಗಿ ಮನೆ ಸೇರುವ ಬಗೆ ಹೇಗೆ ಎಂಬ ಚಿಂತೆಯೂ ಕಾಡಿತು...
ದಿಗಿಲಿನಿಂದ ಓಡುತ್ತಿರುವ ಮಕ್ಕಳನ್ನು ನೋಡಿ ಯಾರಾದರು ನಾನು ನಿಜವಾಗಿಯೂ ನಾನು ಮಕ್ಕಳ ಕಳ್ಳನೆಂದು ತಿಳಿದು ನನಗೆ ತದುಕಿದರೆ..ಎಂಬ ಚಿಂತೆಯೂ ಮೂಡಿತು..ಅಪರಿಚಿತ ಸ್ಥಳ ಬೇರೆ!
ಮಕ್ಕಳು ಓಡುತ್ತಿದ್ದವು,,ನಾನು ನಿಂತೂ ನಿಂತೂ ನಿಧಾನವಾಗಿ ನಡೆಯಡಗಿದೆ....ಸುಮಾರು ಒಂದು ಕಿಮೀ ಸಾಗಿರಬೇಕು...ಅಬ್ಬಾ ರಸ್ತೆಯಂಚಿನ ತಗ್ಗಿನಲ್ಲಿ ಶಾಲೆಯಿತ್ತು...ಮಕ್ಕಳು ಶಾಲೆಗೆ ಹಿಂತಿರುಗಿವೆ ಎಂದು ಸ್ಪಷ್ಟವಾಯ್ತು.....ಹಾಗೆಯೇ ಆಗಿರಲಿ ಎಂದು ಹರಸಿ ವೇಗವಾಗಿ ಮುಂದೆ ಸಾಗತೊಡಗಿದೆ....ಶಾಲೆಯೊಳಗಿನಿಂದ ಏ..ನೋಡ್ರೇ....ಮಕ್ಕಳ ಕಳ್ಳ ಓಡ್ತಾಯಿದ್ದಾನೆ...ಎಂದು ಕಿರುಚಿತ್ತಿರುವುದು ಕೇಳುತ್ತಿತ್ತು....ನನ್ನ ಪರಿಸ್ಥಿತಿಗೆ ನನಗೇ ನಗು ಬಂತು...ಜೋರಾಗಿ ನಗುತ್ತಾ ಮುಂದೆ ಸಾಗ ತೊಡಗಿದೆ....

Thursday, November 24, 2011

ಬತ್ತದ ಹಾಲು








ಪ್ರಿಯರೇ..... ಗದ್ದೆ ಹೊಡೆಯಾಗಿ,ಬತ್ತದ ಹಾಲು ಅಕ್ಕಿಯಾಗುವ ಈ ಸಮಯದಲ್ಲಿ ನಿಸರ್ಗವನ್ನು ನೋಡುವುದೇ ಆನಂದ.ಬತ್ತದ ಗದ್ದೆಯಲ್ಲಿ ಸುಯ್ಯಿಗೊಡುವ ಮೂಡಲ ಗಾಳಿ,ನಿರ್ಮಲ ಆಗಸದಲ್ಲಿ ಅಸ್ತಂಗತನಾಗುತ್ತಿರುವ ನೇಸರ,ಸಣ್ಣಗೆ ಸದ್ದು ಮಾಡುತ್ತಾ ಹರಿವ ತೊರೆ,ಹಸಿರು ಹುಲ್ಲೂ ಕೆಂಪಾಗಿ ತೆನೆಬಿಟ್ಟ ಈ ದಿನಗಳೆಂದ್ರೆ ನನಗಿಷ್ಟ ಜೊತೆಗೆ ಏನೋ ಕಳೆದುಕೊಂಡಂತೆ ಘಾಸಿಯಾಗುವ ಮನಸ್ಸು.ಕಾರಣ ನನಗಂತೂ ಗೊತ್ತಿಲ್ಲ.ಈ ಬಗ್ಗೆ ಯೋಚಿಸಿದರೆ ಹೊಳೆಯುವುದು ನೂರಾರು ಕಾರಣ.ಪ್ರತಿವರ್ಷವೂ ಈ ವೇಳೆಗೆ ಸರಿಯಾಗಿ ನನ್ನ ಮನಸ್ಸಿನಲ್ಲಾಗುವ ಹೋಯ್ದಾಟ ನನಗೇ ಅಚ್ಚರಿಯನ್ನುಂಟು ಮಾಡುತ್ತದೆ!

Tuesday, January 4, 2011

ಚಳಿಯ ಬೆಳಗು!!



ಚಳಿಯ ಛಳಕು!

ಚಳಿಗಾಲ ಮಳೆಗಾಲದಂತಿಲ್ಲ.ಆಗಾಗ ಕೊರೆವ ಚಳಿ,ಎಲ್ಲೋ ಒಂದೆರಡು ದಿನ ಬಿದ್ದ ಹಿಮ,ಆದರೂ ಚಳಿಗಾಲದ ಬೆಳಗಿನ ನೋಟ ವಿಭಿನ್ನವೇ ಸರಿ.ಹಾಲಿನವ ಇಷ್ಟು ಮುಂಚೆ ಏಕೆ ಬರುತ್ತಾನೋ ಎಂದು ಬೈದುಕೊಳ್ಳುವ ಕಾಲವಿದು.ಪ್ಯಾಕೇಟ್ ಹಾಲಾದರೆ ಎಷ್ಟು ಹೊತ್ತಿಗಾದರೂ ಸಿಗುತ್ತೇ ಅದೇ ಸರಿ ಎನ್ನುವ ಸೋಮಾರಿ ಮನಸ್ಸು.ಬೈಗಿನಲ್ಲಿ ಹೊರಟು ಸುಖ ನಿದ್ರೆ ಕೆಡಿಸುವ ಹಾಲಪ್ಪ,ಹಾಲಮ್ಮಂದಿರಿಗೆ ಈ ಫೋಟೋ ಅರ್ಪಣೆ!!


Wednesday, April 7, 2010

**** ಚಿತ್ರ ಕಲ್ಪನೆ--೨ *****

ಚಿತ್ರ ಕಲ್ಪನೆ--2

ಗೆಳೆಯರೆ
ಇಗೋ ಇಲ್ಲಿದೆ ಚಿತ್ರ-ಕಲ್ಪನೆ -೨.
ನೀವು ಈ ಚಿತ್ರಕ್ಕೆ ಸಂಬಂಧಿಸಿದಂತೆ ಕವನ,ಶೀರ್ಷಿಕೆ,ಕಥೆ,ವಿಚಾರ ಮೊದಲಾದವುಗಳನ್ನು ನನ್ನ ಈ ಮೈಲ್ ವಿಳಾಸಕ್ಕೆ ಕಳಿಸಬಹುದು.ಉತ್ತಮ ಬರಹಗಳು ಮುಂದಿನ ಬ್ಲಾಗ್ ಪೋಸ್ಟಿನಲ್ಲಿ ಎಲ್ಲರಿಗೂ ತಲುಪುತ್ತದೆ.

ನನ್ನ ಈ ಮೈಲ್-- mysoremallige2008@gmail.com
ಅಶೋಕ ಉಚ್ಚಂಗಿ

Monday, March 22, 2010

ಮಳೆಯಲಿ ಬಿಸಿಲೆಘಾಟಿಯಲಿ.......

....ಮಳೆಯಲಿ....... ಕಿರಣನ ಜೊತೆಯಲಿ....ಬಿಸಿಲೆ ಘಾಟಿಯ ಹಾದಿಯಲಿ......
ಹಿಂದಿನ ಬ್ಲಾಗ್ ಬರಹ ಮಾಸಿದ ಹಾದಿಯಲ್ಲಿ ಮೂಡಿದ ಹೆಜ್ಜೆಗಳು ಇದರ ಸಾರಾಂಶ....

ನಾನು ನನ್ನೂರಿಗೆ ವರ್ಷದಲ್ಲಿ ಸುಮಾರು ನಾಲ್ಕು ಬಾರಿ ಹೋಗುತ್ತೇನೆ. ಒಂದು ದಿನದ ಭೇಟಿಗೆಂದು ಡಿಸೆಂಬರ್ ನಲ್ಲಿ

ಹೋದವನು ಮಗಳಿಗೆ ಉಚ್ಚಂಗಿ ದರ್ಶನ ಮಾಡಿಸೋಣವೆಂದು ಊರು ಸುತ್ತಲು ಹೊರಟೆ. ಗವಿಬೆಟ್ಟ,ಜುಳುಜುಳು ಹರಿಯುತ್ತಿದ್ದ ಆನೆ ಕಾಲುವೆ ಇವೆಲ್ಲವೂ ನನ್ನಲ್ಲಿ ಏನನ್ನೋ ಕಳೆದು ಕೊಂಡದ್ದು ಮರಳಿ ಪಡೆದಂತೆ ಅವ್ಯಕ್ತ ಆನಂದ ಮೂಡಿಸಿತು.ನನ್ನ ಮಗಳಿಗಂತೂ ಮಗುವನ್ನು ಮೊದಲ ಬಾರಿಗೆ ಜಾತ್ರೆಗೆ ಕರೆದುಕೊಂಡು ಹೋದಂತಾ ಸಂಭ್ರಮ!

ಬತ್ತದ ಗದ್ದೆಗೆ ಕಾಲಿಟ್ಟಾಗ ಬತ್ತದ ತೆನೆಯ ಸುವಾಸನೆ ಕಾಡಿನ ಗಂಧಗಾಳಿಯಲ್ಲಿ ಸೇರಿ ವಿಶಿಷ್ಟ ಪರಿಮಳವನ್ನು ಎಲ್ಲೆಡೆ ಹರಡಿತ್ತು.ಒಂದರ ಹಿಂದೊಂದು ನಿಂತ ಬೆಟ್ಟಸಾಲುಗಳ ಹಿಂದಿನಲ್ಲಿ ಪುಷ್ಪಗಿರಿ ಗಾಂಭೀರ್ಯದಿಂದ ನಿಂತಿತ್ತು.


ಇದರ ಮುಂದುವರೆದ ಭಾಗ ಪುಷ್ಪಗಿರಿ ಬೆಟ್ಟ ಸಾಲಿನಲ್ಲಿ ಮಳೆಗಾಲದಲ್ಲಿ ಅಡ್ಡಾಡಿದ ಅನುಭವವನ್ನು ನನ್ನ ಉಚ್ಚಂಗಿ ಬಳಗ ಬ್ಲಾಗಿನಲ್ಲಿದೆ.....ಇಲ್ಲಿಂದ ಅಲ್ಲಿಗೆ ಹೀಗೆ ಸಾಗಿ.....


Tuesday, March 16, 2010

ಚಿತ್ರ ನನ್ನದು ಕಲ್ಪನೆ ನಿಮ್ಮದು......!

ಚಿತ್ರ ನನ್ನದು ಕಲ್ಪನೆ ನಿಮ್ಮದು......!




ಯುಗಾದಿಯ ಹಾರ್ದಿಕ ಶುಭಾಶಯಗಳು

ನಾನು ನನ್ನ ಈ ಹಿಂದಿನ ಬ್ಲಾಗ್ ಪೋಸ್ಟಿನಲ್ಲಿ ಮೂರು ಚಿತ್ರಗಳನ್ನು ಹಾಕಿ ಯುಗಾದಿಯ ಕಲ್ಪನೆಗೆ ಓದುಗರಿಂದ ಬರಹಗಳನ್ನು ಆಹ್ವಾನಿಸಿದ್ದೆ.ಅನೇಕರು ಚಿತ್ರಗಳು ಚೆನ್ನಾಗಿವೆ ಎಂದು ಮೆಚ್ಚುಗೆ ವ್ಯಕ್ತಪಡಿಸಿದರೆ ಇನ್ನೂ ಅನೇಕರು ಈ ಚಿತ್ರಗಳಿಗೆ ಯುಗಾದಿಯ ಚಿಂತನೆ ಕಳುಹಿಸಿದ್ದಾರೆ.ಈ ಮೂರೂ ಚಿತ್ರಗಳಿಗೂ ಹೊಂದಿಕೆಯಾಗುವಂತೆ ಸರಳ, ಸುಂದರ ಸಂದೇಶ ಕಳುಹಿಸಿದವರು ಬ್ಲಾಗಿಗ ಈಶ್ವರ "ಕಿರಣ" ಭಟ್ http://kiranakomme.wordpress.com/


ನನ್ನ ಚಿತ್ರಕ್ಕೆ “ ಕಿರಣ್ ”ಅವರ ಕಲ್ಪನೆಯಲ್ಲಿ ಯುಗಾದಿ ಹಾರೈಕೆ ಇಂತಿದೆ...


ಬಿದ್ದ ಹೂವು - ಬಿದ್ದ ನೋವಾಗಲಿ


ಆರಿಸಿದ ಹೂವು - ಹರಸಿದ ಬದುಕಾಗಲಿ


ಬೇವಿನ ಚಿಗುರು - ನೋವಿಗೆ ಕಹಿಯಾಗಲಿ


ಅಶ್ವಥದ ಚಿಗುರು ಸಮೃಧ್ಧ ಬದುಕಿಗೆ ಸಂಕೇತವಾಗಲಿ

ಎಂದು ಹಾರೈಸುತ್ತೇನೆ
ಈಶ್ವರ "ಕಿರಣ" ಭಟ್ http://kiranakomme.wordpress.com/
"ಮೌನ ತಬ್ಬಿತು ನೆಲವ ಜುಮ್ಮೆನೆ ಪುಳಕಗೊಂಡಿತು ಧಾರಿಣಿ "

ಎಷ್ಟು ಅರ್ಥಗರ್ಭಿತ ಅಲ್ಲವೇ?


ಕಿರಣ್ ಅವರಿಗೆ ಧನ್ಯವಾದ...
ಇನ್ನು ಮುಂದೆಯೂ ಚಿತ್ರ-ಕಲ್ಪನೆ ವಿಭಾಗದಲ್ಲಿ ಚಿತ್ರಗಳನ್ನು ಹಾಕಿ ನಿಮ್ಮ ಅನಿಸಿಕೆಗಳನ್ನು ಆಹ್ವಾನಿಸುವ ಚಿಂತನೆ ನನಗಿದೆ.ನೀವುಗಳೂ ಸ್ಪಂದಿಸುತ್ತೀರೆಂಬ ವಿಶ್ವಾಸದಲ್ಲಿದ್ದೇನೆ...
ಯುಗಾದಿ ಚಿಂತನೆಯನ್ನು ಹಂಚಿಕೊಂಡ ವೀರೇಶ್ ತಾವರೆಕೆರೆ,"ಸಹಜ",ವಿಶ್ವಾಸ್ ಅವರಿಗೆ ಹಾಗೂ ಪ್ರತಿಕ್ರಿಯಿಸಿದ ಚುಕ್ಕಿಚಿತ್ತಾರ,ಶಂಭುಲಿಂಗ,ದೀಪಸ್ಮಿತ ಅವರಿಗೂ ನನ್ನ ಧನ್ಯವಾದಗಳು.ತಮಗೆಲ್ಲರಿಗೂ ಯುಗಾದಿಯ ಶುಭ ಹಾರೈಕೆಗಳು.
ಚುಕ್ಕಿಚಿತ್ತಾರ said...
chitragalu chennaagive..bellada chitravannoo haakiddare ugaadige bevu, bella aaguttittu....!
March 10, 2010 8:08 AM

ಶಂಭುಲಿಂಗ said...
ಚೆನ್ನಾಗಿದೆ ಚಿತ್ರಗಳು.
March 13, 2010 1:48 AM

Deepasmitha said...
ಒಳ್ಳೆಯ ಚಿತ್ರಗಳು. ಬೇವು ಬೆಲ್ಲ ಜೀವನದ ಅವಿಭಾಜ್ಯ ಅಂಗ. ಬೇವು ಕಹಿ ಇರಬಹುದು, ಆದರೆ ಅತ್ಯುತ್ತಮ ಔಷಧಿ. ಹಾಗೆಯೇ, ಕಹಿಯಾದ ಕಷ್ಟಗಳು ಒಂದರ್ಥದಲ್ಲಿ ಔಷಧಿಗಳೇ, ನಮಗೆ ಅಷ್ಟು ಬೇಗ ಗೊತ್ತಾಗುವುದಿಲ್ಲ ಅಷ್ಟೆ. ನಿಮಗೂ ಯುಗಾದಿಯ ಹಾರ್ದಿಕ ಶುಭಾಷಯಗಳು. ನಿಮ್ಮಿಂದ ಇನ್ನಷ್ಟು ಚಿತ್ರಗಳನ್ನು ನಿರೀಕ್ಷಿಸುತ್ತಿದ್ದೇನೆ
March 14, 2010 4:02 AM

**** ಅಶೋಕ ಉಚ್ಚಂಗಿ *****

Wednesday, March 10, 2010

ಯುಗಾದಿ ಕಲ್ಪನೆ-- ಹಾಗೆ ಸುಮ್ಮನೆ....!!!



ಪ್ರಿಯ ಬ್ಲಾಗ್ ಮಿತ್ರರೇ.....
ಅನೇಕ ಬ್ಲಾಗ್ ಗೆಳೆಯರ ಲೇಖನವನ್ನು ಓದುತ್ತಿದ್ದಾಗ ನನ್ನ ಬ್ಲಾಗಿನಲ್ಲೂ ಹೊಸ ವಿಷಯಗಳನ್ನು ಬರೆಯಲು ಮನಸ್ಸು ಬರುತ್ತೆ.ಆದರೆ ಕೆಲಸದ ಒತ್ತಡ ಜೊತೆಗೆ ಸೋಮಾರಿತನದ ಸಲುವಾಗಿ ಸಾಧ್ಯವಾಗುತ್ತಿಲ್ಲ.
ಇಂದು ಏನಾದರು ಬರೆಯೋಣವೆಂದು ಕುಳಿತಾಗ ಹಾಗೆ ಸುಮ್ಮನೆ ಚಿತ್ರವೊಂದನ್ನು ಹಾಕೋಣ ಎಂದುಕೊಂಡೆ.ಬರಿ ಚಿತ್ರವನ್ನು ಹಾಕುವ ಬದಲಿಗೆ ಕಲ್ಪನೆಗೆ ಇಂಬು ನೀಡುವಂತಹ ಚಿತ್ರವನ್ನು ಹಾಕುವ ಮನಸ್ಸಾಯಿತು.ಯುಗಾದಿ ಹೇಗಿದ್ದರೂ ಹತ್ತಿರವಿದೆ...ಅದೇ ಗುಂಗಿನಲ್ಲಿದ್ದ ನನಗೆ ಯುಗಾದಿಗೆ ಸಂಬಂಧಿಸಿದಂತೆ ಛಾಯಾಚಿತ್ರವೊಂದನ್ನು ಹಾಕಿ ಬ್ಲಾಗಿಗರ ಕಲ್ಪನೆಯಲ್ಲಿ ಯುಗಾದಿಯ ಚಿಂತನೆ ಹೇಗೆ ವ್ಯಕ್ತವಾಗುತ್ತೆ ಎಂದು ನೋಡುವ ಮನಸ್ಸಾಯಿತು...ಇದೋ ಇಲ್ಲಿದೆ ಚಿತ್ರಗಳು.....ನಿಮ್ಮ ಕಲ್ಪನೆಯಲ್ಲಿ ಯುಗಾದಿಯ ಹಾದಿಯಲ್ಲಿನ ಪ್ರಕೃತಿ ಕವಿತೆಯಾಗಿ,ಹಾಡಾಗಿ,ಮನದಾಳದ ಮಾತಾಗಿ,ಚಿಂತನೆಯಾಗಿ,ಸೊಗಸಾದ ಪದಗಳನ್ನು ಜೋಡಿಸಿದ ಸುಂದರ ಸಾಲಾಗಿ ಹೊರಹೊಮ್ಮುತ್ತದೆಂದು ಭಾವಿಸಿದ್ದೇನೆ.ನಿಮ್ಮ ಇತರೆ ಬ್ಲಾಗ್ ಗೆಳೆಯರಿಗೂ ತಿಳಿಸಿ. ನನ್ನ ಪ್ರೊಫೈಲ್ ನಲ್ಲಿ ನನ್ನ ಇ ಮೇಲ್ ವಿಳಾಸವಿದೆ .....ನಿಮ್ಮ ಬರಹಗಳು ಇಲ್ಲಿಗೆ ತಲುಪಲಿ....ಅತ್ಯುತ್ತಮವಾದ ಬರಹಗಳು ಯುಗಾದಿಯ ಸಂದರ್ಭದಲ್ಲಿ ಇನ್ನಷ್ಟು ಚಿತ್ರಗಳ ಜೊತೆಗೆ ಇನ್ನೊಂದು ಬ್ಲಾಗ್ ಬರಹವಾಗಿ ಎಲ್ಲರಿಗೂ ತಲುಪಲಿದೆ...
ಖಂಡಿತಾ ಬರೀತೀರಿ ತಾನೇ.....?




ಚಿತ್ರಗಳು ಯುಗಾದಿಯ ಕಲ್ಪನೆಗಾಗಿ........
ಯಾವುದೇ ಚಿತ್ರಕ್ಕದರು ನಿಮ್ಮ ಕಲ್ಪನೆಯನ್ನು ಬರೆದು ಕಳಿಸಬಹುದು....